Morning Session ( Get Psyched Tracks ) ... အပိုင်း ၂

Morning Session ( Get Psyched Tracks )
...
အပိုင်း ၂
...
အပိုင်း ၁ နဲ့တော့ အချိန်တော်တော်ကွာသွားပါရဲ့ ။
လူကိုယ်တိုင်က အကျင့်ကိုမကောင်းတော့ စထားတဲ့ အလုပ်တခုကို အဆုံးမသတ်နိုင်ဘူးရယ် 😊 ။
တတ်နိုင်သမျှ စိတ်အင်အားတွေအကုန်စုစည်းပြီး တင်ဆက်လိုက်ရပါတဲ့ Morning Session ( Get Psyched Tracks ) အပိုင်း ၂ ပါ။
...

အပိုင်း ၁ မှ ကောက်နှုတ်ချက်

[ ကျွန်တော့်ကိုယ်တိုင်နားထောင်နေတဲ့ playlist တခုရှိတဲ့ အထဲကမှ သီချင်း ၁၀ ပုဒ်ကို ရွေးချယ်ပေးချင်ပါတယ် ။
တတ်နိုင်သမျှ အဆိုတော်မထပ်အောင် ၊ အယ်လ်ဘမ်မထပ်အောင် ၊
ဒါ့အပြင် tempo ကိုလည်း ဖြည်းဖြည်းချင်းတက်လာစေအောင် ကြိုးစား စီစဥ်ပေးထားလို့ သည်းခံဖတ်ရှုပေးကြပါဦး ။ 😃 ]

[ https://m.facebook.com/story.php?story_fbid=1284605554890566&id=1282280511789737 ]

ပထမပိုင်းမှာ သီချင်း ၅ ပုဒ်ကို ရွေးချယ်ပေးခဲ့ပြီးဖြစ်တဲ့အတွက် အခုမှာတော့ နောက်ဆုံး ၅ ပုဒ်ကို ရွေးချယ်ပေးပါမယ် ။

...

၆ ၊ The Great Escape - Boys Like Girls

နံပါတ် ၆ သီချင်းကတော့ ၂၀၀၇ ခုနှစ်မှာ ထုတ်ဝေခဲ့ပြီး BLG အဖွဲ့ရဲ့ ပထမဆုံး အောင်မြင်ခဲ့တဲ့ သီချင်းဖြစ်ပါတယ် ။
Billboard Chart မှာ အဆင့် ၂၃ရရှိခဲ့တဲ့ ဒီသီချင်းလေးဟာဆိုရင်တော့ Pop Punk အမျိုးအစားဖြစ်ပြီးတော့ တက်ကြွတဲ့ စာသားတွေနဲ့ မနက်ခင်းအတွက် စိတ်နိုးကြားစေမယ့် သီချင်းလေးပဲဖြစ်ပါတယ် ။

Youtube - https://youtu.be/JGPgxoIPY6Q

...

၇ ၊ Viva La Vida - Coldplay

ဒီသီချင်းလေးကတော့ မိတ်ဆက်စရာမလိုအောင်ပဲ ရင်းနှီးနေကြလောက်ပါတယ် ။
ဝိုင်ဝိုင်းက မြန်မာသီချင်းအနေနဲ့ ပြန်ဆိုထားတယ်လို့တောင်ထင်ပါရဲ့ ။
၂၀၀၈ ခုနှစ်ထုတ်ဒီသီချင်းလေးကတော့ Billboard Hot 100 မှာ အဆင့် ၁ အပြင် ၂၀၀၉ ခုနှစ် ဂရမ်မီဆုတောင် ဆွတ်ခူးထားတဲ့ သီချင်းလေးဖြစ်ပါတယ် ။
Classic တူရိယာသံတွေနောက်ခံထားတဲ့ Baroque Pop ( မြင်လွယ်အောင်ပြောရရင်  British Pop ) သီချင်းလေးက Cold Play ရဲ့နာမည်ကျော် ' ဘဝအကြောင်းနဲ့ စိတ်အားထက်သန်စရာ  စာသားတွေ ' ပါဝင်ထားပြီး တူရိယာသံသန့်သန့်နဲ့ပဲ စိတ်တည်ငြိမ်မှုတွေ ပေးစွမ်းနိုင်ပါလေရဲ့ ။

Youtube - https://youtu.be/9ldOuVuas1c

...

၈ (က) ၊ Tongue Tied - Grouplove

ဒီသီချင်းလေးကတော့ ဝေဖန်သူတွေ ပက်ပက်စက်စက် အပြစ်ပြောတာခံခဲ့ရတဲ့ သီချင်းလေးပါပဲ ။ စာသားတွေကိုလည်း အပြစ်ပြောခံရ ၊ rapping style ကိုလည်း အကောင်းမြင်မခံရတဲ့ ဒီသီချင်းလေးကတော့ Grouplove ရဲ့ အအောင်မြင်ဆုံးသီချင်းပါပဲ ။ Billboard အဆင့် ၄၂ ရရှိခဲ့ပြီး ၂၀၁၁ခုနှစ်ထုတ် indie pop သီချင်းလေးဟာတော့ သင့်အမြင်မှာလည်း 'အချစ်ရုပ်ရှင် ခပ်ပေါပေါတစ်ကားအဆုံး စာတန်းထိုး' သီချင်းလိုပဲ ကြားနေရကောင်းပါရဲ့ ။
သို့ပေသိ ဒီသီချင်းလေးရဲ့ tempo မှန်မှန်နဲ့ မြူးမြူးသံစဥ်လေးကိုတော့ ကျွန်တော်သဘောကျမိပါတယ် ။
တကယ်လို့သာ သင်ကတော့ ဘယ်လိုမှသဘောမကျဆိုရင်တော့ Neon Trees ရဲ့ Animals ကို အစားထိုး လမ်းညွန်ရပါလိမ့်မယ် ။

Youtube - https://youtu.be/1x1wjGKHjBI

...

၈ (ခ) ၊ Animals - Neon Trees

ဒီသီချင်းကတော့ Billboard အဆင့် ၁၃ ရရှိခဲ့ပြီး ၂၀၁၁ ခုနှစ်အတွက် အကောင်းဆုံး Alternative သီချင်းအဖြစ်ရွေးချယ်ခံခဲ့ရပါတယ် ။
၂၀၁၀ ခုနှစ်မှ ဖြန့်ချိခဲ့ပြီး Train, Taylor Swift , Panic at the Disco! တို့က ပြန်ဆိုရတဲ့အထိ အောင်မြင်ခဲ့ပါတယ် ။
Alternative Rock ပြီပြီ ၊ Tempo မှန်မှန်နဲ့ သီချင်းမြူးမြူးကြွကြွဟာ သင့်ရဲ့ မလန်းမဆန်းစိတ်တွေကို နိုးထစေမှ အမှန်ပါပဲလေ ။

Youtube - https://youtu.be/gM7Hlg75Mlo

...

၉ ၊ Black & White - G.na

အမှန်တော့ ကိုရီးယားသီချင်းတွေအကြောင်းသိပ်မပြောရဲပါတယ် ။
Kpop သီချင်းတပုဒ်ကောင်းတယ် မကောင်းဘူးဆိုတာ သီချင်းပေါ်ထက် သီဆိုသူကျော်ကြားမှုပေါ်မူတည်နေပါတဲ့ အတွက် တယောက်အကြိုက်နဲ့ တယောက် မတူနိုင်ပါလေ ။
ဒါပေမယ့် ထူးထူးခြားခြားရွေးချယ်လိုက်တာကတော့ G.na ရဲ့ Black&White သီချင်းလေးပါပဲ ။ သမားရိုးကျ Kpop သီချင်းပဲဖြစ်ပြီး ၂၀၁၁ ခုနှစ် မှာဖြန့်ဝေခဲ့ပါတယ် ။ G.na ရဲ့ ပထမဆုံးအောင်မြင်တဲ့ သီချင်းလေးဖြစ်ပြီး (ကျွန်တော့်အမြင်မှာတော့) g.na ရဲ့ တပုဒ်ထဲသော သီချင်းကောင်းဖြစ်ပါတယ် ။
Kpopတို့ ထုံးစံ မြူးမြူးကြွကြွလေးပဲဖြစ်ပြီး နားထောင်ရတာ နားစွဲတဲ့ သီချင်းလေးပဲ ဖြစ်တာမလို့ ရွေးချယ်လိုက်ပါတယ် ။

Youtube - https://youtu.be/ntkLP26htZA

...

၁၀ ၊ Final Song - MØ

နောက်ဆုံးသီချင်းလေးအနေနဲ့ Final Song ကိုပဲ ရွေးချယ်လိုက်ပါတယ် ။ (see? I made a pun) 😂
၂၀၁၆ ခု မေလမှာ ထုတ်ဝေခဲ့တဲ့ ဒီသီချင်းလေးဟာတော့ electropop သီချင်းလေးပဲဖြစ်ပြီး xylophone သံလေးနောက်ခံထားထာပါတယ် ။ ခုချိန်ထိတော့ Billboard US ကို မဝင်ရောက်သေးတဲ့ ဒီသီချင်းဟာတော့ တည်တည်ငြိမ်ငြိမ်ရှိနေသလို မြူးမြူးကြွကြွလေးလည်း ရှိနေလို့ အပိတ်သီချင်းအဖြစ် ရွေးချယ်ပေးလိုက်ရပါတယ် ။

Youtube - https://youtu.be/WUcXQ--yGWQ

...

အားလုံးပဲ ဒီ playlist လေးနဲ့ မလန်းမဆန်း မနက်ခင််းများကို ကျော်လွှားနိုင်ကြပါစေလေ 😁 ။

...

ကျွန်တော်ဟာ စာမေးပွဲသာမရှိရင် ဘာကိုမှ လုပ်ချင်စိတ်မရှိတဲ့အတွက် စာတွေကို အစကလောက်မတင်နိုင်တော့တာ ကိုယ်တိုင်လည်းသတိထားမိပါရဲ့ ။ နောက်ကိုလည်း ကြိုးစားပြီး ဆက်ရေးပါဦးမယ် ။
ဒီနေရာထိ သည်းခံ ဖတ်လာပေးတဲ့အတွက် ကျေးဇူးတင်ရှိပါတယ် ။
နောက်ထပ် သီချင်းကောင်းတွေကို ထပ်ပြောပြချင်ပါသေးရဲ့ ။

Peace. V

...

Morning Session ( Get Psyched Tracks ) ... အပိုင်း ၁

Morning Session ( Get Psyched Tracks )
...
အပိုင်း ၁
...

ဒီ Playlist လေး ဘယ်လို လုပ်ဖြစ်ပါလိမ့် ?
ဒီရက်ပိုင်း စာမေးပွဲတွေနည်းနည်း ထပ်နေပါရဲ့ ၊ နဂိုထဲက စာပုံမှန်မကျက်တတ်တဲ့ ကျွန်တော့်အဖို့တော့ ဒီရက်ပိုင်းဟာ အိပ်မှုန်စုံဖွားရက်တွေဆိုပါတော့လေ ။
မနက်ပိုင်း အိပ်ရာက မထချင်ထချင်နဲ့ ထလာရတဲ့နေ့မျိုးတွေမှာ တမနက်လုံးမှိုင်နေတတ်ပါတယ် ။
ဒီတော့ ကျွန်တော် အမြဲပြုလုပ်တတ်တဲ့အကျင့်တခုကတော့ မနက်ခင်းမှာ စိတ်ကို နိုးကြွစေတတ်တဲ့ သီချင်းတစ်ချို့ကို Playlist တခုအနေနဲ့ထားပြီး ကျောင်းသွားရာလမ်းတလျှောက် ကားပေါ်မှာ ၊ တက္ကစီပေါ်မှာ နားထောင်သွားခြင်းပါပဲ ။
တကယ်တော့ ဒီလိုသီချင်းမျိုးတွေကို စုရတာ လွယ်လှတယ်တော့မဟုတ်ပါဘူး ။ Playlist တခု ပြုလုပ်တဲ့အခါ အမြဲတမ်းလိုလို လုပ်တတ်တဲ့ အကျင့်တခုကတော့ မိမိနားထောင်နေကြသီချင်းတွေကိုသာ စုစည်းမိသွားတတ်ပြီး Most Played စာရင်းနဲ့ထူးမခြားနား ဖြစ်နေတတ်ခြင်းပါပဲ ။

Music Psychologist နဲ့ Cambridge PhD. candidate David M.Greenberg ရဲ့ ပြောကြားမှုအရဆိုရင်တော့
မနက်ခင်း Playlist တွေမှာ အဓိကလိုအပ်တာဟာ
၁ ၊ ဖြည်းဖြည်းချင်း နိုးကြွလာစေခြင်း
စပါပြီဆိုထဲက ဆူဆူညံညံသီချင်းတွေထက်စာရင် ဖြည်းဖြည်းချင်းစတင်ရမှနေ မြူးကြွလာတဲ့ သီချင်းတွေဟာ ပိုပြီး လူကို နိုးကြားစေပါတယ် ။
၂ ၊ အကောင်းမြင်စေတတ်ခြင်း
နိုးလာချိန်မှ စပြီး တနေကုန်လုံး တက်ကြွနေစေဖို့အတွက် အကောင်းမြင်စာသားများက ပိုစွမ်းဆောင်နိုင်တယ်လို့ ဆိုပါတယ် ။
၃ ၊ မြူးကြွသံစဥ်များ
မနက်ခင်းအချိန်အခါမှာ စာသားများအပြင် သံစဥ်ဟာလည်း အရေးပါတဲ့ အပိုင်းတခုပဲဖြစ်ပါတယ် ။ ပုံမှန်အားဖြင့် စာသားကို အာရုံစိုက် နားထောင်တတ်ကြပေမယ့် BPM ၁၀၀ - ၁၃၀ လောက်ရှိတဲ့ သီချင်းတွေက ပိုပြီး နိုးကြားစေပါတယ် ။
( Reference - http://www.businessinsider.com/20-best-wake-up-alarm-songs-on-spotify-2015-11 )

...

ကျွန်တော့်ကိုယ်တိုင်နားထောင်နေတဲ့ playlist တခုရှိတဲ့ အထဲကမှ သီချင်း ၁၀ ပုဒ်ကို ရွေးချယ်ပေးချင်ပါတယ် ။
တတ်နိုင်သမျှ အဆိုတော်မထပ်အောင် ၊ အယ်လ်ဘမ်မထပ်အောင် ၊
ဒါ့အပြင် tempo ကိုလည်း ဖြည်းဖြည်းချင်းတက်လာစေအောင် ကြိုးစား စီစဥ်ပေးထားလို့ သည်းခံဖတ်ရှုပေးကြပါဦး ။ 😃

...

၁ ၊ Fight Song - Rachel Platten

ဒီသီချင်းကိုတော့ ၂၀၁၅ ခုနှစ် ဖေဖော်ဝါရီလမှာ ထုတ်ဝေခဲ့ပြီး ပရိသတ်များကရော ဝေဖန်သူများကပါ သဘောကျနှစ်ခြိုက်ခဲ့ကြပါတယ် ။
Billboard Hot 100 မှာ နံပါတ် ၆ နေရာရောက်ရှိအောင် အောင်မြင်ခဲ့ပါတယ် ။
စာသားများကလည်း တက်ကြွနေပြီး Rachel Platten ရဲ့ နူးညံ့တဲ့ အသံ နဲ့ နှေးရာမှတဆင့် မြူးကြွလာတဲ့ သံစဥ်များ ပါဝင်တဲ့ ဒီသီချင်းကို ပထမဆုံးသီချင်းအနေနဲ့ ရွေးချယ်လိုက်ရပါတယ်။

Youtube - https://youtu.be/xo1VInw-SKc

...

၂ ၊ Can't Stop The Feeling ! - Justin Timberlake

ပထမသီချင်းလေးက tempo ကို နှေးရာမှ မြန်ရာကို ဆွဲခေါ်ခဲ့ပြီးနောက်မှာတော့ ဒုတိယအနေနဲ့ Disco-funk သီချင်းလေးတပုဒကိုပဲ တန်းရွေးချယ်လိုက်ပါတယ် ။
ဒီသီချင်းလေးကိုတော့ ၂၀၁၆ မေလမှာ ထုတ်ဝေခဲ့ပြီး နိုင်ငံတကာမှာ နံပါတ် ၁ နေရာကို ရယူခဲ့ပါတယ် ။
ကျွန်တော်အတွက်တော့ Pharrell Williams ရဲ့ Happy သီချင်းကို နေရာဝင် အစားထိုးသွားတဲ့သီချင်းလေးပါပဲ ။
ဝေဖန်သူရေးရာတွေအားလုံးကလည်း အကောင်းမြင်မှတ်ချက်ပေးခဲ့ကြပြီး
" တကယ်လို့ သောကြာနေ့ကို သီချင်းတပုဒ်လို့တင်စားရရင် ဒီသီချင်းကိုပဲ ရွေးရပါလိမ့်မယ် '' လို့ကို ချီးကျူးခံထားရပါတယ် ။
ပေါ့ပေါ့ပါးပါးသံစဥ်လေးတွေနဲ့ ဒီသီချင်းဟာ မနက်ခင်းတွေတိုင်းမှာ တကယ်ကို စိတ်ရွှင်လန်းစေတဲ့ သီချင်းတပုဒ်ပါပဲ ။

Youtube - https://youtu.be/ru0K8uYEZWw

...

၃ ၊ Anyway You Want It - Pentatonix, The Filharmonic, The Cantasticos, The Singboks, Penn Masala ( Pitch Perfect 2 soundtrack)

ဟုတ်ပါတယ် ။
PP2 ဟာ PP1 ဇာတ်လမ်း ကို ခြေဖျားတောင်မမှီပေမယ့် ကျွန်တော်မကြာခဏ ပြန်ပြန်ကြည့်ဖြစ်ရတဲ့ အကြောင်းကိုက သီချင်းတွေပါပဲ ။
ဒီသီချင်းကို ၁၉၈၀ ခုနှစ်ထဲက Journey အဖွဲ့က ဖျော်ဖြေခဲ့ပါတယ်။
အခု ပြောပြထားတဲ့ ဗားရှင်းဟာတော့ Pitch Perfect 2 ရဲ့ World Acapella Championship မှာ အဖွဲ့ပေါင်းစုံက ပူးပေါင်းသီဆိုထားခြင်းဖြစ်ပါတယ် ။
ဘာသာစကားမျိုးစုံနဲ့ သီဆိုထားတဲ့ ဒီသီချင်းလေးဟာ စာသားတလုံးမှ နားမလည်ရင်တောင် Acapella သံစဥ်တွေနဲ့ပဲ မြူးကြွနေတဲ့ သီချင်းလေးဖြစ်လို့ တတိယ သီချင်းအနေနဲ့ ရွေးချယ်လိုက်ပါတယ် ။

Youtube - https://youtu.be/HQIcwuzqpx8

...

၄ ၊ Shut Up and Dance - Walk the Moon

၂၀၁၄ ခု စက်တင်ဘာလထုတ် သီချင်းတပုဒ်ဖြစ်ပြီး WTM အဖွဲ့ရဲ့ အအောင်မြင်ဆုံးသီချင်းလည်း ဖြစ်ပါတယ် ။
Indie Pop , Dance Rock အမျိုးအစားဖြစ်ပြီး ရိုးရိုးရှင်းရှင်းစာသားလေးများနဲ့အတူ မြူးမြူးကြွကြွသံစဥ်လေးတွေကြောင့် Billboard Hot 100 ရဲ့ နံပါတ် ၄ အဖြစ်ကို ရရှိခဲ့တဲ့အပြင် ဒီ playlist လေးရဲ့ စတုတ္ထသီချင်း အဖြစ်ကိုပါရရှိခဲ့ပါတယ် ။ 😃

Youtube - https://youtu.be/6JCLY0Rlx6Q

...

၅ ၊ Running With The Wild Things - Against The Current

ဒီသီချင်းလေးဟာ နိုင်ငံတကာမှာ ထင်ထင်ရှားရှား အောင်မြင်မှုရရှိထားခြင်းလည်း မရှိပါဘူး ။
ဒီသီချင်းလေးကတော့ မြန်မာ facebook အသိုင်းအဝိုင်းမှာ တချိန်ကနာမည်ကြီးခဲ့တဲ့ Beauty and the Beat cover သီချင်းထဲက မိန်းကလေးအဆိုတော် Christie Costanza ရဲ့ Band - Against The Current - ကနေ သီဆိုထားတဲ့ Pop Punk သီချင်းတပုဒ်ဖြစ်ပါတယ် ။ သီချင်းလေးရဲ့ တက်ကြွတဲ့သံစဥ် ၊ ပြင်းထန်တဲ့ စာသားတွေက တနေကုန်လုံးအတွက် တက်ကြွရွှင်လန်းစေဖို့ ခွန်အားတွေပေးနေနိုင်မှာပါ ။

Youtube - https://youtu.be/bcvuYNhfj-c

...

ပထမပိုင်းကို ဒီမှာခဏရပ်နားလိုက်ပါဦးမယ် ။
အားလုံးလည်း ဒီသီချင်း ၅ ပုဒ်ကို အရင်ဆုံး နားထောင်ခံစားကြည့်လိုက်ပါဦး ။

ဒီနေရာထိ သည်းခံ ဖတ်လာပေးတဲ့အတွက် ကျေးဇူးတင်ရှိပါတယ် ။
နောက်ထပ် သီချင်းကောင်းတွေကို ထပ်ပြောပြချင်ပါသေးရဲ့ ။

Peace. V

...

Khit Thit Kyaut _ Idiots

မြန်မာသီချင်းတွေဟာ အမှန်တော့လည်း လက်တကမ်းမှာ ရှိနေတဲ့အတွက် ရေးဖို့ အစီအစဥ်မရှိသော်ငြားလည်းပေါ့နော် 😃

ဒီ အယ်ဘမ်ဟာ တော်တော်ကို စောင့်မျှော်ခဲ့ရပါသော အယ်ဘမ်ဖြစ်တာကလည်း တကြောင်း ၊
နောက်ပြီးတော့ S.I.R ဆိုတဲ့ အဖွဲ့ကြီးဟာ ကျွန်တော့်အတွက် အရမ်းသဘောကျ အရေးပါတဲ့ ဂီတအဖွဲ့ဖြစ်တာကလည်း တကြောင်း ၊
မနေနိုင် မထိုင်နိုင် ရေးမိလိုက်ပါကြောင်း ။ 😂

...

ပထမအချက်ကိုတော့ Idiots ရဲ့ လူအဂီတ ကို သဘောကျမိတဲ့ ပရိသတ်အားလုံး ထပ်တူခံစားမိမှာပဲ ဖြစ်လို့ သိပ်တော့ ရှင်းပြစရာမရှိပါ။ ၂၀၁၁ ခုနှစ် နှစ်လည်ပိုင်း နှစ်နှောင်းပိုင်းလောက်မှာထဲက ရေမွန်ကိုယ်တိုင်က ( facebook မှာပဲ ဖြစ်ပါလိမ့်မယ် ) ဒုတိယ အယ်ဘမ်ကို ခေတ်သစ်ကျောက် လို့ နာမည်ပေးထားပြီး စပြီး ပြင်ဆင်နေပါပြီလို့ ကြေငြာခဲ့ပါတယ် ။
၂၀၁၂ ၂၀၁၃ ၂၀၁၄ ၂၀၁၅ ၂၀၁၆ ဆိုတော့ ၅ နှစ်လောက် နီးနီး ကို စောင့်မျှော်နေခဲ့ရတဲ့ အယ်ဘမ်ပဲ ဖြစ်ပါတယ် ။

ဒီကြားထဲမှာတော့ ဒီသီချင်းကတော့ ခေတ်သစ်ကျောက် ထဲ ပါမှာပဲ ဆိုပြီး Online မှာ ထွက်ထွက်လာတတ်တဲ့ သီချင်းတွေ ရှိခဲ့ပါသေးရဲ့ ။
" အချိန်တွေ နှောင်းခဲ့ပြီ '' ၊ " တခန်းရပ် '' နဲ့ '' အပါးတော် '' တို့ သီချင်းတွေကတော့ ကျွန်တော်တို့ သူငယ်ချင်းတွေကြားမှာ တော်တော် နာမည်ကြီးခဲ့ဖူးပါရဲ့ ။
" အချိန်တွေ နှောင်းခဲ့ပြီ '' ကိုတော့ ရတနာမိုင် ပြန်ဆိုတာ ကြားခဲ့ရပြီး ( https://youtu.be/utYp8GzBqo8 )
" အပါးတော် '' ကိုတော့ ရိုမန်ဆန် ရှိုးမှာ ဆိုသွားတာ တွေ့ခဲ့ကြရပါတယ် ။ ( https://youtu.be/ri6zWwpc24w )

တခန်းရပ် သီချင်းကိုတော့ အရင်က စန္ဒယားအသံလေးနဲ့ အကြမ်းသွင်းထားတာ ကြားခဲ့ကြရပြီး '' တယောက်ထဲနေတဲ့အချိန် မိုးရွာချိန်တွေ '' မှာ ဆွေးလို့တော်တော်ကောင်းခဲ့ပါတယ် ။ ( https://soundcloud.com/hteza/hate-you-this-much )
ခု ဒီအယ်ဘမ်မှာတော့ စန္ဒယားသံအပြင် ဂစ်တာ ၊ တယော အစရှိတဲ့ တူရိယာ စုံစုံလင်လင် နဲ့ တီးခတ်ထားပြီးတဲ့အတွက် သီချင်း အသစ်တပုဒ်လိုမျိုး ခံစားချက် အသစ်ကို ရမိပြန်ပါတယ် ။

...

လူအဂီတထဲမှာ ကျွန်တော် ခုအချိန်ထိလည်း စွဲနားထောင်မိနေဆဲတဲ့ သီချင်းတွေကတော့ '' ချန်ခဲ့ ၊ မင်းနဲ့ နီးဖို့ ၊ နေရစ်ခဲ့တော့ ၊ မထိုက်တဲ့အလင်း ၊ ဆုလာဘ် ၊ မင်းအတွက်မင်း ၊ တွေ့ရတာဝမ်းသာတယ် '' ( ကုန်သလောက်ပါပဲ 😃 ) တို့ပဲ ဖြစ်တဲ့အတွက် ကျွန်တော် ကြိုက်တဲ့ သီချင်းအမျိုးအစားကိုတော့ မှန်းကြည့်လို့ လွယ်မယ် ထင်ပါတယ် ။ ဒါကြောင့် သီချင်း အကြမ်းတွေကို သိပ်သဘောကျပုံ မပြခဲ့ရင် ခွင့်လွှတ်ကြစေကုန် 😂 ။
ဒါ့အပြင် ဒုတိယ အယ်ဘမ်ကို ပြောပြချိန်မှာ ရှေ့အယ်ဘမ်နဲ့ ယှဥ်ယှဥ်ပြနေမှ မြင်လွယ်မှာ ဖြစ်လို့ သည်းခံဖတ်ပေးကြပါ ။

...

အဖွင့်အနေနဲ့ '' လူအ '' ဆိုတဲ့ သီချင်းနဲ့ အစပြုထားပါတယ် ။
" ငါ့ဘဝ ပြန်ယူ " လိုမျိုး Rock အဖွင့်သီချင်းပါပဲ ။ အစပိုင်း စက္ကန့်ပိုင်းအတွင်းမှာ " This is Motherf**king IDIOTS '' ဆိုတဲ့ အာခြစ်သံကြီးရဲ့နောက်ကွယ်က '' နောက်ဆုံးတော့ Idiots အနေနဲ့ ပြန်လာပါပြီ '' ဆိုတဲ့ အဓိပ္ပာယ်ကို အားလုံး ခံစားမိမယ် ထင်ပါတယ် ။ '' ကိုယ်လုပ်ချင်ရာ လုပ်တဲ့ လူအတယောက်ဟာ မင်းတို့အတွက် '' ဆိုတဲ့ စာသားကိုတော့ သဘောကျမိပါတယ် ။

ဒုတိယသီချင်းကတော့ Distortion ဆိုတဲ့ သီချင်းပါ ။ ဒီသီချင်းကိုတော့ ဒီလပိုင်း အရင် ၁လ ၂လ လောက်မှာ သူငယ်ချင်း တယောက်ဆီက ရခဲ့ဖူးပါတယ် ။ '' အသက်ငွေ့ငွေ့ '' ဆိုတဲ့ သီချင်းနဲ့ နှိုင်းယှဥ်လို့ ရမယ် ထင်ပါရဲ့ ။ '' နောက်ကျော '' လို သီချင်းမျိုးကို သဘောကျမိတဲ့သူတွေအတွက်ကတော့ အရမ်းသဘောကျမိလောက်တဲ့ သီချင်းတစ်ပုဒ်ဖြစ်ပါတယ် ။ Show တွေမှာ Live ဆိုလို့ ကောင်းမယ့်သီချင်းလည်း ဖြစ်ပါရဲ့ ။

" ဒီလိုပဲ '' ဆိုတဲ့ သီချင်းကိုတော့ '' နေရစ်ခဲ့တော့ '' ဆိုတဲ့ သီချင်းနဲ့ တင်စားပါရစေ ။ Rock အမျိုးအစားတူတဲ့အတွက်သက်သက် မဟုတ်ပဲ ပေးချင်တဲ့ message ကလည်း သဘောတရားတူတူပဲ ဖြစ်လို့ပါ ။ '' ဘဝမှာ အမှားတွေ လုပ်မိရင်လည်း ပြန်ပြီး ကြိုးစားပါ ၊ အနိမ့်အမြင့် အတက်အကျတွေဟာ ဘဝပါပဲ '' ဆိုတဲ့ သဘောဆောင်တဲ့ သီချင်းတွေပါပဲ ။

" မလိုတော့ဘူး ၊ သူရဲကောင်း '' သီချင်းတွေကတော့ '' မထိုက်တဲ့ အလင်း ၊ မင်းနဲ့နီးဖို့ '' တို့လိုမျိုး အချစ်သီချင်းချိုချို အေးအေးလေးများ ဖြစ်လို့ ဟုတ်ပါတယ် ၊ တခေါက်နားထောင်ပြီးထဲက ကျွန်တော့်အတွက်တော့ ချက်ချင်းပဲ အကြိုက်ဆုံးသီချင်းစာရင်းဝင်ဖို့တန်းစီနေပါရဲ့ ။

" ဘာလိုသေးလဲ '' ဆိုတဲ့ သီချင်းကတော့ '' မင်းအတွက်မင်း '' လိုမျိုးပဲ ကိုယ့်ကိုယ်ကို တန်ဖိုးထားတတ်ဖို့ အကြောင်းကို ပြောပြသွားပါတယ် ။

"တခန်းရပ် '' သီချင်းကတော့ အပေါ်မှာ ပြောခဲ့ပြီးသလိုပါပဲ ။ version အသစ် အဖြစ်တီးခတ်ထားတာဖြစ်ပါတယ် ။ အသစ်လည်း နားထောင်လို့ ကောင်းပေမယ့် ၄နှစ်လောက်နားထောင်ခဲ့တဲ့ version အဟောင်းလေးကိုလည်း စွဲနေမိပါသေးရဲ့ ။

" အကျ '' ဆိုတဲ့ သီချင်းရောက်ချိန်မှာတော့ သီချင်းနှေးနှေးတွေရဲ့ tempo ကနေ ပြန်လည် မြန်ဆန်လာပြန်ပါတယ် ။ '' အတု '' ဆိုတဲ့ သီချင်းလိုမျိုးလို့ တင်စားချင်ပါတယ် ။ 😀

" ယုံကြည်မှု '' ဆိုတဲ့ ဒီသီချင်းကိုတော့ '' အဓိပ္ပါယ် '' ဆိုတဲ့ သီချင်းနဲ့ ယှဥ်ပြချင်ပြီး
" ယုံကြည်လိုက် မင်းကလွဲရင် အသေးအဖွဲပဲ ထင်ထား ..  ဘာကိုမှ ထပ်မရလည်း နင်ရှိလို့ ပြည့်စုံသွား '' ဆိုတဲ့ စာသားကို မြင်တာနဲ့ပဲ အချစ်သီချင်းကောင်းတပုဒ်မှန်း ခန့်မှန်းနိုင်ပါတယ် ။

" မင်းနဲ့ပတ်သတ်ရင် '' ဆိုတဲ့ သီချင်းကတော့ အပိတ်သီချင်းဖြစ်တဲ့ '' အိပ်ရာဝင်တေး '' နဲ့ အတူ ဒီအယ်ဘမ်မှာ ကျွန်တော် အကြိုက်ဆုံး သီချင်းပါပဲ ။ မရှိရှိအောင် နှိုင်းပြရရင်တော့ '' တွေ့ရတာ ဝမ်းသာတယ် '' နဲ့ ယှဥ်ရမှာ ဖြစ်ပေမယ့် နှစ်ပုဒ်လုံးဟာ ကိုယ့်ပုံစံနဲ့ ကိုယ် ကောင်းမွန်ပါတယ် ။

" အရှင်ဂီတ '' ကိုတော့ ထပ်မပေးနဲ့တော့ နဲ့ နှိုင်းယှဥ်ချင်ပြီး
" ရူးသူဘဝ '' ကိုတော့ ဘာနဲ့ယှဥ်ရမယ်ဆိုတာ ကို မသိပါဘူး ။ ကျွန်တော့်တယောက်ထဲအနေနဲ့တော့ အောင်လအသံရယ် ရေမွန်အသံရယ်ကို သေချာမခွဲနိုင်ဘူးဖြစ်နေပါတယ် ။
Tracklist ကို စတွေ့ချိန်မှာ အမျှော်လင့်ထားဆုံးသီချင်း ဖြစ်ပေပေမယ့် သိပ်တော့ သဘောမကျမိဘူးရယ်ပါ ။

အဆုံးပိတ် အိပ်ရာဝင်တေးကတော့ '' ဆုလာဘ် '' နဲ့ ယှဥ်ရမှာဖြစ်ပေမယ့်  တယောသံလေးနောက်ခံထားတဲ့ ဒီသီချင်းလေးဟာ ကျွန်တော် အကြိုက်ဆုံးသီချင်းဖြစ်လာပါတယ် ။
ပထမ လူအဂီတ မှာ ကျွန်တော်အကြိုက်ခဲ့ဆုံးကလည်း အဆုံးပိတ် '' တွေ့ရတာ ဝမ်းသာတယ် '' ပဲ ဖြစ်တဲ့အတွက်ကြောင့်
Idiots အယ်ဘမ်တွေဟာ အဆုံးသတ်ကောင်းတယ်လို့ ခံယူမိပါရဲ့ ။

...

ကျွန်တော်ကိုယ်တိုင်လည်း အယ်ဘမ် အစအဆုံးကို တခေါက်ပဲ နားထောင်ရသေးတာဖြစ်ပြီး
နှစ်သက်မိတဲ့ သီချင်းတွေသာ ထပ်ခါနားထောင်မိတဲ့ အတွက် တချို့ သီချင်းတွေအပေါ်မှာ အမြင်မတူတာတွေ ရှိကောင်းပါသေးရဲ့ ။

ဒီအယ်ဘမ်ကို အားပေးချင်တယ်ဆိုရင်တော့ နီးစပ်ရာ City Books and Music ( City Mart ) တွေ
၄၆လမ်း အပေါ်ဘလောက် ( The Sun Music)  မှာ ဝယ်ယူနိုင်ကြပြီးတော့
Myanmar Music Store ( http://www.myanmarmusicstore.com/AlbumDetail.aspx?albumid=B0001241 ) ကနေကလည်း တရားဝင် ဝယ်ယူအားပေးနိုင်ကြမှာပဲ ဖြစ်ပါတယ် ။

...

ဒီနေရာထိ သည်းခံ ဖတ်လာပေးတဲ့အတွက် ကျေးဇူးတင်ရှိပါတယ် ။
နောက်ထပ် သီချင်းကောင်းတွေကို ထပ်ပြောပြချင်ပါသေးရဲ့ ။

Peace. V

Cross my mind _ Twin Forks

ဒုတိယ အနေနဲ့ ပြောပြချင်တာကတော့

...

ဒီသီချင်းလေးကတော့ ကိုရီးယားကား ကြိုက်ပါတယ်ဆိုသူများ ကြားဖူးကြပါလိမ့်မယ် ။
၂၀၁၄ ခုနှစ်က နာမည်ကြီး ဒရာမာဇာတ်ကားဖြစ်တဲ့ '' It's Okay, That's Love '' ( မြန်မာ နာမည်တော့ ဘယ်လိုပေးကြလေတယ် မသိပေါ့လေ ) ဂျိုအင်ဆောင်နဲ့ ဂုံဟျိုဂျင် တို့ပါဝင် သရုပ်ဆောင်ထားကြတဲ့
အဆိုပါ ဇာတ်ကားမှာ သီချင်းကိုယ်တိုင်ကိုတော့ ဖွင့်ပြခြင်းရှိမရှိ မမှတ်မိတော့ပေမယ့် ဒီသီချင်းရဲ့ Hook ဖြစ်တဲ့ လေချွန်သံလေးကို ဖောဖောသီသီသုံးထားတာ သတိပြုမိကြမှာပါ ။ ဒီလေချွန်သံလေး ကြားမိရင်တော့ အမှတ်ရသူများ ရှိလိမ့်မယ်လို့ ယုံကြည်မိပါတယ်လေ ။

...

သီချင်းလေး နာမည်ကတော့ '' Cross My Mind '' လို့ ခေါ်ပါတယ် ။ '' (တခါတရံတော့) သတိရမိပါရဲ့ " လို့ ဆီလျော်သလို ဘာသာပြန်ခွင့်ပြုပါ ။
သီချင်းလေးကိုတော့ Folk Rock လို့ သတ်မှတ်ထားပေမယ့် မယ်ဒလင်လေးရယ် လေချွန်သံချိုချိုလေးတွေနဲ့ ဒီသီချင်းဟာ ကျွန်တော့အတွက်တော့ Country or Acoustic Pop နှစ်မျိုးထဲက တစ်မျိုးပါပဲ ။ 😃
လမ်းခွဲ ပြတ်စဲသွားကြတဲ့ ချစ်သူ နှစ်ဦး ၊
ပြန်ပြီး ဆုံတွေ့မိချိန် ၊
ကောင်ကလေးက ကောင်မလေးကို ပြောပြနေတဲ့ ပုံစံမျိုး ရေးဖွဲ့ထားတာပါ ။

" ခဏလောက် တူတူရှိနေပေးပါ
( ငါက လူတွေကို သိပ်မရင်းနှီးတတ်တဲ့ အတွက် ) ငါ ဒီလို မပြုံးမရယ်ရတာ ကြာပါပြီ
ဘာမှ မတောင်းဆိုပါဘူး..
နင်နဲ့ ခဏ စကားပြောချင်ရုံသက်သက်ပါ ''
- ဆိုတဲ့ စာသားလေးကို တော်တော်များများ ခံစားနားလည်နိုင်ကြမယ် ထင်ပါရဲ့ ။

" Good company is hard to find
ကိုယ့်ကို နားလည်နိုင်တဲ့သူဟာ သိပ်ရှားတာပဲကွယ် ''

ပြန်လည်ပြီး ချစ်သူဖြစ်ကြစို့ ၊ ပြန်လည်ပြီး လက်တွဲကြစို့လို့ မပြောပါပဲ ၊ ငါ့ကို မင်းလောက် နားလည်နိုင်တဲ့ လူ သိပ်ရှားတယ်

ဆိုတဲ့ စာသားဟာ ဒီသီချင်းမြူးမြူးလေးမှာတောင် သိပ်ရင်နာစရာကောင်းပါတယ် ။

Youtube - https://youtu.be/ibtmDGykLLg

...

ဒီသီချင်းကို သီဆိုသူတွေကတော့ Twin Forks ဆိုတဲ့ Folk Rock Band ပဲ ဖြစ်ပါတယ် ။
သူတို့ကတော့ Indie (independent) Band တခုဖြစ်တဲ့ အတွက် နာမည်မရှိ အဖွဲ့တခုလို့ ပြောနိုင်သလို
၂၀၁၁ခုနှစ်မှ စတင်ဖွဲ့စည်းခဲ့ပေမယ့် Album တခုသာ ထုတ်နိုင်ခဲ့လို့ တက်သစ်စ အဖွဲ့ဆိုလည်း မှန်နိုင်ပါတယ် ။

သူတို့ အဖွဲ့အနေနဲ့ အသိများတဲ့ သီချင်းဟာ Back to you ( https://youtu.be/_uIOSj_49Bo ) နဲ့ အခု Cross my mind နှစ်ပုဒ်ပဲ ရှိပါတယ် ။
Album တခုတည်း ထုတ်ဝေရသေးတဲ့ အတွက် One Hit Wonder လို့တော့ ပြောရမှာ စောလွန်းပါသေးရဲ့ ။
မယ်ဒလင်လေးနဲ့ လေချွန်သံလေးနဲ့ ဒီသီချင်းလေးကိုတော့ နားထောင်ကြည့်စေချင်ပါသေးတယ် ။

...

ကျွန်တော့်အနေနဲ့ ဘယ်နှရက် တကြိမ် တင်မယ် တွေ အာမခံလို့ မရတဲ့ အနေအထားဖြစ်လို့
တရက်ထဲပဲ အများကြီးတင်တာတွေရှိနိုင်သလို အကြာကြီးနေမှ ထပ်တင်တာမျိုးလည်း ရှိနိုင်ပါရဲ့ ။
သီချင်းတပုဒ်နားထောင်မိလို့ အရမ်းသဘောကျမိတာနဲ့ပဲ ချက်ချင်းရေးတင်ကောင်းပါရဲ့ ။
ဘယ်လိုပဲ ဖြစ်စေ. ဒီနေရာထိ သည်းခံ ဖတ်လာပေးတဲ့အတွက် ကျေးဇူးတင်ရှိပါတယ် ။
နောက်ထပ် သီချင်းကောင်းတွေကို ထပ်ပြောပြချင်ပါသေးရဲ့ ။

Peace. V